9 - എന്റെ കാഴ്ച

#9_Movie
(Spoiler Alert)

പ്രിത്വിരാജിന്റെ അഭിമുഖങ്ങളിൽ എല്ലാം തന്നെ മലയാള സിനിമയെ ലോക സിനിമയോളം വിശാലമാക്കാനായി തന്നാൽ കഴിയുന്നത് ചെയ്യണം എന്ന ആഗ്രഹം അദ്ദേഹം പ്രകടിപ്പിക്കാറുണ്ട്. ആ ആഗ്രഹ പൂർത്തീകരണത്തിലേക്കുള്ള മികച്ച ശ്രമമാണ് 9 എന്ന ചിത്രം

8...

സയൻസ് ഫിക്ഷൻ, ഹൊറർ ത്രില്ലർ, ഫാമിലി ഡ്രാമ എന്നിങ്ങനെ 3 വിഭാഗത്തിലും ഉൾപ്പെടുത്താം എങ്കിലും ആദ്യ രണ്ടു വിഭാഗത്തിൽ ഉള്ളതാണെന്ന് പ്രേക്ഷകനെ തെറ്റിദ്ധരിപ്പിക്കുന്ന മികച്ചൊരു ഫാമിലി ഡ്രാമയാണ് 9. സയൻസിനെയും ഹൊററിന്റെയും പിൻബലത്തിൽ അഛനും  മകനും തമ്മിലുള്ള സ്നേഹ ബന്ധത്തിന്റെ കഥയാണ് ചിത്രം പറയുന്നത്

7...

 ശാസ്ത്രവും മാനുഷിക ബന്ധങ്ങളും ഫിക്ഷനും കൂട്ടിക്കലർത്തി ഒടുവിൽ ശാസ്ത്രത്തെ ശരി വെച്ച് പൂർണ്ണത കൈവരിക്കുന്ന ധീരമായ ഒരു ഉദ്ധ്യമമാണ് 9. ഒരു പക്ഷെ മണിച്ചിത്രതാഴിന്‌ ശേഷം ആ പൂർണ്ണത കൈവരിക്കുന്ന ചിത്രവും ഇതാകാം.

6...

ഭൂമിയുടെ അരികിലൂടെ ഉൽക്ക കടന്ന് പോകുന്നതിന് ശേഷമുള്ള 9 ദിവസത്തെ കഥ. ആഗോള മാനമുള്ള വിഷയത്തെ മലയാളത്തിലേക്ക് ചുരുക്കുമ്പോൾ സംഭവിക്കാവുന്ന വൈകല്യങ്ങൾ ഒന്നും തന്നെ ഇല്ലാത്ത വിധം ചിത്രം അണിയിച്ചോരുക്കിയിട്ടുണ്ട്. ശേഖർ മേനോന്റെ ബാക്ക് ഗ്രൗണ്ട് സ്കോറും രാമനുജത്തിന്റെ ക്യാമറയും ചിത്രത്തിനെ ഓരോ നിമിഷവും ജീവസ്സുറ്റതാക്കുന്നു

5...

അഭിനേതാക്കൾ എല്ലാം തന്നെ മികച്ച പ്രകടനം കാഴ്ച വെച്ചു. പ്രത്യേകിച്ച് ആദമായി അഭിനയിച്ച കുട്ടിയും വാമിഖയും. കൊച്ച് കുട്ടിയുടെ നിഷ്കളങ്കതയും നഷ്ടങ്ങളുടെ ദുഖവും മാസ്റ്റർ അലോക് ഭദ്രമാക്കിയപ്പോൾ വാമിഖ സുന്ദരമായി ഭയം നിറച്ചു. അനാവശ്യമായി കഥാപാത്രങ്ങൾ ഇല്ല  എന്നത് പോലെ അനാവശ്യമായ സംഭാഷണങ്ങളും ചിത്രത്തിലില്ല. മംമ്ത അവതരിപ്പിച്ച കഥാപാത്രം ഗർഭിണിയാണ് എന്നു പ്രിത്വിയെ അറിയിക്കുന്ന രംഗമുണ്ട്. അവിടെ "നമുക്ക് ഈ കുട്ടി വേണോ"" എന്നൊരു ചോദ്യം സാധാരണ നിലയിലാണെങ്കിൽ ഉണ്ടാവേണ്ടതായിരുന്നു. ഇവിടെ പ്രിത്വിയുടെ മുഖത്തു നിന്നും പ്രേക്ഷകനെ കൊണ്ട് ആ ചോദ്യം വായിപ്പിയ്ക്കുകയാണ് സംവിധായകൻ ചെയ്തിട്ടുള്ളത്

4...

ചിത്രത്തിന്റെ ആദ്യം കാണിക്കുന്ന ഗ്രഹണത്തിലെ ഇരുട്ടും വെളിച്ചവും പോലെ, സയൻസ് - അന്ധ വിശ്വാസാം, സ്നേഹം - വെറുപ്പ്  എന്നിങ്ങനെ രണ്ട് തലങ്ങളെ മനോഹരമായി ബാലൻസ് ചെയ്യുന്നുണ്ട് ചിത്രം. എത്രയൊക്കെ സയൻസിൽ വിശ്വസിക്കുന്നു എന്നു പറഞ്ഞാലും ഉള്ളിൽ ഒരല്പം അന്ധ വിശ്വാസം ഉണ്ടാകും അത് പോലെ തന്നെ മനസിൽ എത്ര തന്നെ സ്നേഹം ഉണ്ടെങ്കിലും എവിടെയെങ്കിലും ഒരല്പം വെറുപ്പും കാണും.
അന്ധ വിശ്വാസങ്ങൾ സയൻസിനെ തോൽപ്പിക്കുന്നത് പോലെ തന്നെ അപകടമാണ് മനസ്സിലെ വെറുപ്പ് സ്നേഹത്തെ കീഴടക്കുന്നത്. ഇത് പ്രേക്ഷകനിലേക്ക് എത്തിക്കുന്നിടത്താണ് ചിത്രം വേറെ ഒരു തരത്തിലേക്ക് ഉയരുന്നത്.

3...

ചിത്രം അവസാനിക്കുമ്പോൾ വാമിഖാ അവതരിപ്പിച്ച ഈവ എന്ന കഥാപാത്രം യാഥാർഥ്യമാണോ അല്ലയോ എന്ന ഒരു ചോദ്യം ബാക്കി വെക്കുന്നുണ്ട്. പ്രേക്ഷകന്റെ യുക്തിക്കനുസരിച് പൂരിപ്പിച്ചെടുക്കാവുന്നതാണ്. യാഥാർഥ്യമല്ല എന്നതാണ് എന്റെ നിഗമനം. ചിത്രത്തിന്റെ ആദ്യഭാഗത്തും അവസാന ഭാഗത്തും പ്രകാശ് രാജും പ്രിത്വിരാജും  തമ്മിലുള്ള സംഭാഷണങ്ങൾ അത് തന്നെയാണ് സൂചിപ്പിക്കുന്നത്.

2...

പ്രിത്വിയുടെ മുൻകാല ചിത്രങ്ങളായ എസ്‌റ, അബ്രഹാമിന്റെ സന്തതികൾ തുടങ്ങിയവയുമായി പ്രമേയ പരമായും മേക്കിങ്ങിലും ഉള്ള സാമ്മ്യതകൾ, ഒന്നു സൂക്ഷിച്ചു നോക്കിയാൽ മണിച്ചിത്രത്താഴ്‌മായുള്ള പ്രത്യക്ഷവും പരോക്ഷവുമായ സാമ്മ്യം എന്നിവ ചിത്രത്തിന്റെ പോരായ്മയാണ്. അവസാന രംഗങ്ങളിൽ ഇമോഷണൽ ആയുള്ള പ്രിത്വിയുടെ ശബ്ദവും പോരായ്മയായി തോന്നി

1...

ഇത് കയ്യടിച്ച് അവസാനിപ്പിക്കാവുന്ന സിനിമയല്ല, ചിത്രത്തിന്റെ ഫൈനൽ ക്രെഡിറ്റിന് ശേഷമുള്ള രംഗവും കണ്ട്‌ തലക്ക്  ഒരു ഇടി ഇടിച്ച് ചിന്തിക്കേണ്ട ചിത്രമാണ്.
ചിത്രത്തിന്റെ തുടക്കത്തിൽ തന്നെ പറയുന്നുണ്ട് ചോദ്യങ്ങൾ ചോദിച്ച് കൊണ്ടേയിരിക്കണമെന്നു. ചിത്രം കഴിയുമ്പോഴും ചോദ്യങ്ങൾ ബാക്കിയാവുകയാണ്. പ്രേക്ഷകൻ അവനവനോട് തന്നെ വീണ്ടും വീണ്ടും ചോദ്യങ്ങൾ ചോദിച്ചെങ്കിൽ മാത്രമേ ചിത്രത്തിന്റെ പൂർണ്ണ രൂപം മനസ്സിലാക്കാൻ കഴിയുകയുള്ളു. ഇത്തരത്തിൽ ചിത്രം ഒരുക്കിയ സംവിധായകൻ ജിനൂസ് മുഹമ്മദ് തീർച്ചയായും അഭിനന്ദനം അർഹിക്കുന്നുണ്ട്.

Go....

മലയാളത്തിൽ വ്യത്യസ്തമായ ചിത്രങ്ങൾ ഉണ്ടാകണം എന്നാഗ്രഹിക്കുന്നവർ തീർച്ചയായും കണ്ടിരിക്കേണ്ട ചിത്രമാണ് 9. ഒരു ഫീൽ ഗുഡ് എന്റര്ടെയിനർ പ്രതീക്ഷിക്കാതെ ഒരു പരീക്ഷണ ചിത്രം കണ്ട് ആസ്വദിക്കാനായി  ടിക്കറ്റ് എടുക്കാവുന്നതാണ്. ഒറ്റ കാഴ്ചയിൽ എല്ലാവരെയും തൃപ്തിപ്പെടുത്തണം എന്നില്ലെങ്കിലും ഒന്നു ചിന്തിച്ചാൽ ആസ്വാദനത്തിന്റെ മറ്റൊരു ലോകം തന്നെ ചിത്രം നമുക്ക് മുന്നിലേക്ക് വച്ചു നീട്ടുന്നുണ്ട്.
So Go and explore 9🎬
#9movie
#prithviraj