നാടൻ പ്രേമം - എസ് കെ

2018 ഇൽ ആദ്യമായ് വായന പൂർത്തിയാക്കിയ പുസ്തകമാണ് എസ് കെയുടെ ആദ്യ നോവലായ നാടൻ പ്രേമം. ഒരു നാട്ടിൻ പുറത്തെ കാഴ്ചകൾ പോലെ ലളിതവും സുന്ദരവുമായൊരു കൃതി. രവീന്ദ്രൻ എന്ന പണക്കാരനായ പട്ടണവാസി ഒഴിവുകാലം ചിലവഴിക്കാനായി മുക്കം എന്ന ഗ്രാമത്തിൽ എത്തപ്പെടുന്നതും അവിടെ വെച്ച് അയാൾ ഗ്രാമത്തിലെ പെണ്കുട്ടിയുമായി പ്രണയത്തിലാകുന്നതുമാണ് ഇതിവൃത്തം. ഈ ഒരു ഇതിവൃത്തം ഇന്ന് നമ്മൾ വേറെ പല രചനകളിലും ചലച്ചിത്രങ്ങളിലുമായി ആവർത്തിച്ച് കണ്ടിട്ടുണ്ട്. അതിനാൽ  പ്രമേയത്തിൽ യാതൊരു പുതുമയും തോന്നിയില്ല. പക്ഷേ  അദ്ദേഹം ഈ കൃതി എഴുതിയത് 1941ലാണ് എന്ന കാര്യം ഓർക്കേണ്ടിയിരിക്കുന്നു. എഴുതിയ കാലത്ത് ഈ  കൃതി പുതുമയുള്ളതായിരുന്നിരിക്കണം. വർഷം ഏറെ കഴിഞ്ഞപ്പോൾ ആളുകൾക്കും നഗര ഗ്രാമ കാഴ്ചകൾക്കും മാറ്റം വന്നെങ്കിലും പ്രണയത്തിന്റെ കാതലായ ഭാവത്തിന് യാതൊരു മാറ്റവും ഇല്ലെന്നു ഈ കൃതി ഇന്ന് വായിക്കുമ്പോൾ മനസ്സിലാകും. നോവൽ വായനയിൽ തന്നെ ഒരു ചലച്ചിത്രാനുഭൂതി പ്രദാനം ചെയ്യുന്നുണ്ട്. പിൽക്കാലത്ത് ഇത് ചലച്ചിത്രമാക്കി മാറ്റിയിട്ടുണ്ട് എന്നാണ് മനസ്സിലാക്കാൻ സാധിച്ചത്.