ഒടുവിൽ ചിന്തകൾ അവസാനിപ്പിച്ച് ഓട്ടോക്കാരനോട് ബസ് സ്റ്റാൻഡ് വരെ എത്ര രൂപയാകും എന്ന് ചോദിച്ചു.
"മീറ്റർ കാശാ"
അയാളുടെ ഉത്തരം ഞെട്ടിക്കുന്നതായിരുന്നു. പ്രോബബിലിറ്റിയുടെ ഏതൊക്കെ സമവാക്യങ്ങൾ ഉപയോഗിച്ച് കൂട്ടിയാലും അങ്ങനെ ഒരുത്തരം ലഭിക്കാത്തത് കൊണ്ട് വിശ്വസിക്കാനാകാതെ ഞാൻ ഒന്നൂടെ ചോദിച്ചു.
"എത്രയാ ചേട്ടാ?"
"മീറ്റർ കാശാ"
അപ്പോഴും വിശ്വസിക്കാൻ കഴിഞ്ഞില്ലെങ്കിലും ഞാൻ ഓട്ടോയിൽ കയറി. സാധാരണ ഒരു മ്യൂസിയത്തിൽ വെച്ച പ്രദർശന വസ്തു മാത്രമാകാറുള്ള മീറ്റർ ആ ചേട്ടൻ സ്റ്റാർട്ട് ചെയ്തു.
ക്ണീം...
സീറ്റിനു രണ്ടു വശത്തായി കലാഭവൻ മണി ചേട്ടന്റെ ചിരിച്ചിരിക്കുന്ന ഫോട്ടോ. മനുഷ്യ മനസിൽ മരണമില്ലാത്ത കലാകാരൻ.
ഡ്രൈവറുടെ സീറ്റിന്റെ പിറകിലായി ഒരു ബോർഡിൽ എഴുതി വെച്ച വാക്കുകൾ വായിച്ചപ്പോൾ ഞാൻ വീണ്ടും ഞെട്ടി
"അതിഥി ദേവോ ഭവ"
ഓട്ടോ എഴുത്തിന്റെ മ്യാരകമായ പല അവസ്ഥാന്തരങ്ങളും കണ്ടിട്ടുണ്ടെങ്കിലും ഇത്ര മനുഷ്യത്വപരമായ ഒന്ന് ഇത് ആദ്യമായാണ് കാണുന്നത്. Unique - മനസ്സ് മന്ത്രിച്ചു. ലോകത്തിൽ വേറെ ഒരിടത്തും ഓട്ടോയിൽ ഇങ്ങനെ ഒരു ബോർഡ് ഉണ്ടാകാൻ സാധ്യത ഇല്ല.
ഒടുവിൽ സ്റ്റാൻഡിന് അടുത്ത ഒരു റോഡിൽ ഓട്ടോ നിർത്തി
"മോനെ ഇവിടെ എറങ്ങിക്കോ. ദാ ആ സീബ്രാ ക്രോസ് കടന്നാൽ സ്റ്റാൻഡ് ആയി. വേണെങ്കിൽ ഞാൻ ആ റോഡിലൂടെ ചുറ്റി സ്റ്റാൻഡിന്റെ മുന്നിൽ കൊണ്ട് വിടാ. പക്ഷെ ഇങ്ങള് വെർതെ 10 ഉറുപ്യ കൂടുതൽ കൊടുക്കണ്ടി വെരും"
ഈശ്വരാ ഞാൻ സ്വപ്നം കാണുകയാണോ? ഇത്രയും നന്മയുള്ള ഓട്ടോക്കാരോ??? ഒരു കോഴിക്കോട്ടുകാരൻ ആണെങ്കിലും പഠിച്ചതും ഇപ്പോൾ ജോലി ചെയ്യുന്നതും കേരളത്തിന് പുറത്ത്‌ ആയതിനാൽ കോഴിക്കോട്ടുകാരുടെ ഇങ്ങനെയുള്ള സ്നേഹമൊന്നും അധികം അനുഭവിക്കാൻ കഴിഞ്ഞിരുന്നില്ല.
കാശ് കൊടുത്ത് ഒരു നിറഞ്ഞ പുഞ്ചിരി സമ്മാനിച്ച് ഞാൻ നടന്നു. പക്ഷെ ആ ചേട്ടൻ ചെറിയൊരു ചിരി മാത്രമാണ് തിരിച്ച് തന്നത്. കാരണം ഈ നന്മകൾ എനിക്ക് മാത്രമാണ് പുതിയൊരു അനുഭവം അദ്ദേഹത്തെ സംബന്ധിച്ച് ഇത് എല്ലാ ദിവസങ്ങളിലും ആവർത്തിക്കുന്ന കാര്യങ്ങൾ മാത്രമായിരിക്കും.
- ✍️രാഹുൽ
അപൂർവ്വം.
മറുപടിഇല്ലാതാക്കൂകോഴിക്കോട് നിന്നും എനിയ്ക്ക്‌ കബളിപ്പ്‌ കിട്ടിയിട്ടുണ്ട്‌