ഇങ്ങനെയും ചില പ്രണയങ്ങൾ

കുറച്ച് ദിവസങ്ങളായി ഫേസ്ബുക്ക് സ്ക്രോൾ ചെയ്യുമ്പോൾ ഒരു ‘ഫ്രണ്ട്സജഷനിൽ’ അവളുടെ കണ്ണുടക്കി  നിൽക്കുന്നു. 

-വിനോദ്-

ബ്ലാക്ക് ആൻഡ് വൈറ്റിൽ മുഖത്തിന്റെ ഒരു വശം മാത്രം കാണിച്ചുള്ള പ്രൊഫൈൽ പിക്ച്ചർ. പണ്ടത്തെ പോലെ തന്നെ കട്ടി കണ്ണട. ഫ്രണ്ട് റിക്വസ്റ് അയക്കാനായി അവൾ പല തവണ തുനിഞ്ഞതാണ്. പിന്നെ മടിച്ചു. ഒടുവിൽ പണ്ട് അവനു ലവ് ലെറ്റർ കൊടുത്തൊരു കൗമാരക്കാരി അവളുടെ ഉള്ളിലേക്ക് ചാടിക്കയറി. അവൾ വിനോദിന് ഫ്രണ്ട് റിക്വസ്റ് അയച്ചു. തന്റെ ഫ്രണ്ട് റിക്വസ്റ് കാണുമ്പോൾ അവൻ ഒരു മെസേജ് അയച്ചേക്കും എന്ന ചിന്ത വെറുതെ  മനസ്സിൽ മുള പൊട്ടി. പണ്ടത്തെ ആളായിരിക്കില്ലല്ലോ ഇപ്പോൾ. അൽപ സമയത്തിനകം മഴത്തുള്ളി പോലൊരു  നോട്ടിഫിക്കേഷൻ അവളുടെ ഹൃദയം നനച്ചു. 

‘Vinod accepted your friend request’

തൊട്ടടുത്ത നിമിഷത്തിൽ തന്നെ തേടിയെത്തുന്ന ഒരു മെസേജിനായി അവൾ കാത്തിരുന്നു. പക്ഷെ ഒന്നും വന്നില്ല. മനസിന്റെ താഴ്‌വരയിൽ നിരാശയുടെ മൂടൽ മേഘങ്ങൾ. ചിലത് എത്ര കാലം കഴിഞ്ഞാലും മാറ്റമില്ലാതെ തുടരും, ഇവന്റെ സ്വഭാവവും അത് പോലെ തന്നെയെന്ന് അവൾക്ക് തോന്നി. എന്തായാലും ഫ്രണ്ട്റിക്വസ്റ്റ് അയച്ചല്ലോ, മെസേജും അങ്ങോട്ട് അയക്കുക തന്നെ.

‘'ഹായ്! ഓർക്കുന്നോ?”

അവൾ മെസേജ് അയച്ചു

“വിനീതയെ എങ്ങനെ മറക്കാനാണ്😊”

പെട്ടെന്ന് തന്നെ മറുപടി വന്നു 

“ഫ്രണ്ട് റിക്വസ്റ് ആക്സപ്റ്റ് ചെയ്തപ്പോൾ ഞാൻ കരുതി നീ ഒരു മെസേജ് അയക്കുമെന്ന്. എവിടെ!  പഴയ സ്വഭാവത്തിന് ഒരു മാറ്റവുമില്ലല്ലോ😀”

“ 😊 “

കൂട്ടൊന്നുമില്ലാത്തൊരു സ്മൈലി മാത്രമായിരുന്നു മറുപടി 

‘'നിനക്ക് എന്നോട് ഒന്നും ചോദിക്കാനില്ലേ?ഒന്നുമില്ലെങ്കിലും നിനക്ക് ഞാൻ പണ്ടൊരു പ്രണയലേഖനം തന്നതല്ലേ?”

 

“ചോദിച്ചത് നന്നായി. അന്ന് സ്‌കൂളിൽ വെച്ച് നീ ആ പ്രണയ ലേഖനം തന്നത് മുതൽ ചോദിക്കണമെന്ന് കരുതിയതാണ്. ക്‌ളാസിലെ ഏറ്റവും സുന്ദരനെ പ്രണയിക്കുന്നത് മനസിലാക്കാം, ക്‌ളാസിലെ പഠിപ്പിസ്റ്റിനേയോ ആക്റ്റീവ് ആയവനെയോ പ്രണയിക്കുന്നതും മനസിലാക്കാം. പക്ഷെ എന്ത്‌ കണ്ടിട്ടാണ് നീ എന്നെ പ്രണയിച്ചത്?”

“അതിന് എനിക്കും കൃത്യമായ ഉത്തരമില്ല. പക്ഷെ ഒന്നറിയാം നിന്നെ കാണുമ്പോൾ കത്തിക്കയറുന്ന സംഗീതം പോലെ എന്റെ ഹൃദയം തുടിക്കുമായിരുന്നു. പക്ഷെ നീ എന്റെ പ്രണയത്തിനെ ചവറ്റ് കുട്ടയിലേക്ക് വലിച്ചെറിഞ്ഞിരിക്കും എന്നിനെക്കുറപ്പാണ്. ദുഷ്ടൻ!!

ഇതയച്ച് കഴിഞ്ഞ് കുറച്ച് സമയത്തേക്ക് അവനിൽ നിന്നും മറുപടി ഉണ്ടായില്ല. അത്രക്ക് പറയേണ്ടായിരുന്നോ? അവൾ ചിന്തിച്ചു. അല്ല, അവനിത് അർഹിക്കുന്നുണ്ട്. അന്നാ സംഭവത്തിന് ശേഷം അവൻ തന്റെ മുഖത്തു പോലും നോക്കിയിരുന്നില്ല. എപ്പോഴും തന്നിൽ നിന്നും ഒഴിഞ്ഞു മാറി നടന്നു. ചിന്തകൾ 20 വർഷങ്ങൾക്കപ്പുറത്തേക്ക് കാട് കയറുമ്പോഴാണ് വീണ്ടും ഒരു മെസേജ്.

ഒരു ഫോട്ടോയാണ്. ലോഡ് ആകുന്നില്ലല്ലോ. പതിവ് പോലെ അവൾ തന്റെ തോൽ'വി' നെറ്റ്വർക്കിനെ പ്രാകി. ഒടുവിൽ ഫോട്ടോ കറങ്ങി തിരിഞ്ഞ് തെളിഞ്ഞു. ഒരു നിമിഷം അവൾക്ക് വിശ്വസിക്കാൻ കഴിഞ്ഞില്ല. താൻ അന്ന് കൊടുത്ത ലവ് ലെറ്റർ!! അതവൻ ഇപ്പോഴും സൂക്ഷിക്കുന്നു. അവളുടെ കണ്ണ് നിറഞ്ഞു. പെട്ടെന്നാണ് ഭർത്താവ് റൂമിലേക്ക് വന്നത്.

“എന്താടോ കണ്ണൊക്കെ നിറഞ്ഞിരിക്കുന്നല്ലോ “

“ ഏയ്‌.. പണ്ട് ഫെയിലിയർ ആണെന്ന് കരുതിയ ഒരു പ്രണയം സക്സസ് ആയിരുന്നു എന്നറിഞ്ഞ സന്തോഷം കൊണ്ട് കണ്ണ് നിറഞ്ഞതാ”

അവൾ ഫോൺ അവന്  നേർക്ക് നീട്ടി 

“ഓഹ് അപ്പൊ ഇതാണല്ലേ താൻ പറയാറുള്ള ആദ്യ പ്രണയലേഖനം. കൊള്ളാലോ എഴുത്ത്. ചുമ്മാതല്ല താൻ കവിയായത്. അല്ല, ഇതിപ്പോ പഴയ കാമുകനും താനും. നമ്മൾ ഔട്ട് ആകുമോ?”

അവൾ ചിരിച്ചിട്ട് അവന്റെ കയ്യിൽ നുള്ളി. അവൾ ഫോൺ വാങ്ങി അവന് ഒരു ഹൃദയത്തിന്റെ സ്മൈലി മറുപടിയായി അയച്ച ശേഷം ഭർത്താവിനെ കെട്ടിപിടിച്ചു പറഞ്ഞു

“ഇനി അവൻ മെസേജ് അയക്കില്ല. അതുറപ്പാണ് “

മേശപ്പുറത്തു വെച്ച ഫോണിലെ മെസഞ്ചറിൽ  അവൾ അയച്ച മെസേജ് അവൻ കണ്ടു എന്ന ചിഹ്നം തെളിഞ്ഞു. ഇനി ഒരു മറുപടി വരില്ലെന്ന് മനസിലാക്കിയത് പോലെ ആ ഫോണിന്റെ സ്‌ക്രീൻ ഓഫായി.